Sirrí er 14 ára. Hún er búin að vera skotin í Villa í allan vetur. Þau hittast í fjörugu partíi sem dregst fram á rauðanótt en daginn eftir er Sirrí eitthvað einkennileg í líkamanum. Hún er með rauða bletti á hálsi og höndum og sér betur en áður; jafnvel í myrkri – svo er heyrnin skarpari. Það er eins og allur heimurinn breytist, en á sama tíma berast sjúkdómar út og fólk klikkast. Ofsahræðsla grípur um sig. Brátt kemst Sirrí að því að Villi er ekki allur þar sem hann er séður. Er hann kannski ekki eins góður og sætur og hún hélt?
Þúsundir barna og unglinga þekkja bókaflokkinn GÆSAHÚÐ eftir Helga Jónsson. Hér hefst nýr flokkur fyrir eldri lesendur þar sem allir ættu að finna eitthvað við sitt hæfi. Þessar bækur eru lengri og magnaðri á allan hátt – í raun geðveikislega spennandi. Höfundur lofar því að lesandinn bókstaflega tryllist
af spennu og hræðslu ...
Þessi GÆSAHÚÐ er ekki fyrir yngri en 14 ára!